تاريخ النشر: 2014-01-06 | 14:41
تاريخ النشر: 2014-01-06 | 14:41
أوعى تعلّي الصوت
عسكر السلطان على حروف الكلام
مسكالك النبوت
أي حرف يحيد عن سطور الخليفة
يا حزين الشوق تموت
خلّي صوتك في مرايات الخوف
أوعى تنسى
أو تقول صارت ظروف
يعملوا منك خروف
يخنقوا صوتك لأنك لسه تحلم بالحروف
سكوت
سكوت
لو تعلّي الصوت
تموت
**
الفصاحة والنباهة في الكلام
عند مولانا الخليفة
وانت يعني مين ياجيفة
أوعى فكرك يوم يُشك
أو يُعك
تبقى ليلتك مش ظريفة
والكلاب تنهش في لحمك
تنسى أسمك
تنسى رسمك
تنسى أصلاً إنك انتَ تبقى أنتَ
يعني يبقى كل عمرك عيشة موت
سكوت
سكوت
لو تعلّي الصوت
تموت
**
أنت شايف الحياة حلوة وجميلة
زي قصة ألف ليلة
العساكر في الشوارع
تنسف الماضي وتخنق في المضارع
أمّا بكرة من مراسيم الخليفة لسّه ضايع
يعني فعلاً
زي ليلة وألف ليلة
جتنا نيلة
بالحياة المرّة الذليلة
يبقى أحسن لو نموت
سكوت
سكوت
لو تعلّي الصوت
تموت
**
البوليس السرّي
واقف فوق أنين الحرف صخرة
يرهب الهمس اللي بكرة
في احتمالة يبقى فكرة
في ابتهالة يبقى ثورة
البوليس السرّي واقف بين ضلوعك
يكتم النبض اللي يحلم بالأماني
يمنع شروق الأغاني
بس عايزك تبقى عايش وسط جوعك
البوليس السرّي عايزك
تبقى عايش في التابوت
يعني عايزك تبقى في حالة سكوت
سكوت
سكوت
لو تعلّي الصوت
تموت
**
خليل مكاوي
غزة - فلسطين
جميع الحقوق محفوظة لـ أمد للاعلام © 2007 - 2026
