الصحفية نائلة خليل: ما تمزحش مع المخابرات

أمد/ رام الله : كتبت الصحفية والناشطة المجتمعية نائلة خليل على صفحتها الخاصة "الفيس بوك" مساء الثلاثاء ، عن الواقعة التي جرت معها عند دوار المنارة بمدينة رام الله ، وأكدت أن رجال أمن يرتدون ملابس مدنية اندسوا بين المتظاهرين ليقمعوا المسيرة التي جرجت منددة بمشاركة الرئيس محمود عباس في جنازة رئيس اسرائيل السابق ، شمعون بيريز.

وجاء في تدوينة خليل :

" ما تمزحش مع المخابرات

اليوم عند دوار الساعة. .في ميمعة الهجوم على المتظاهرين من قبل المشاركين بمسيرة دعم الشرعية. .كنت أقف انا وزملاء وزميلات صحافيين

اقترب مني رجل للوهلة الأولى بتفكر انه "غلبان" لابس قميص أزرق مقلم ..وجه غير حليق...مهموم..بصوت واطي وابتسامة كبيرة سألنا :انتم مخابرات؟؟

رديت ع طيبته وابتسامته بابتسامة وسؤال:احنا مخابرات؟؟؟ ضحك ضحكة من الدان للدان. .قلت بنفسي نياله اله نفس يضحك..غلبان

بعد عشر ثواني كان في اكتر من 8 رجال يحيطون بنا ويصرخوا ليش بتكذبوا أنكم مخابرات؟؟؟

انا طلعت بعيون بزملاءي :يا جماعة شو في الكاميرا الخفية...احنا صحافة مش متظاهرين. .. بس ع الفاضي بلشوا يكتروا..اجا واحد شكله مهم..انا كيف عرفت انه مهم ..طلع بطاقة وحطها بوجهي. .الأمانة ما شفت شي. .بس قدرت انه مهم ..تجمعوا علينا اكتر ..وعرفوا انا احنا صحافة... ثم ظهر الرجل الغلبان ابو قميص أزرق مقلم ومش حالق لحيته. . وإذا بنظرات الغضب وصوته الهامس أصبح صراخا

تجمع رجال أكثر كلهم أجهزة هيك واضح من حكيهم. .كبر الموضوع. .صار بدهم جوالاتنا. .وواحد تاني عمل ع المطرح قضية انتحال مخابرات؟ ؟؟انا سألته انتحار مين يا عم؟؟؟

هو مين اللي انتحر ؟؟

قاا: انتوا قلتوا أنكم مخابرات

قلت له:قول والله

تدخل الزلمة ابو قميص مقلم : اه انتوا قلتوا أنكم بشتغلوا معنا

أنا : انت مخابرات؟ ؟؟؟؟؟ بالله عليك مع شهقة

المهم اجا ضابط مخابرات الأمانة انه سكرة. .هادي رايق ومؤدب. ..وشكله ما بيضرب _والله ما بمزح_

حكالنا ليش حكيتوا هيك

قلت له:بالله عليك اجا واحد ع باب الله لابس قميص مقلم ويضحك متسائلا انتم مخابرات؟؟

جاوبناه بسؤال حنون استنكاري حتى ما يخاف منا احنا مخابرات؟؟؟؟؟

المهم تركونا بعد نص ساعة ..وعشرات العيون تتربص بنا

الدرس المستفاد :أي واحد لابس قميص أزرق مقلم لو سألك بصوت هامس انت انسان؟؟؟؟ أعمل نفسك ميت وتردش عليه واترك الحوار ينتحر