أخر ما كتبه الراحل الابنودي"قصيدة الموت"

ولا اطلع من عمر مكرم

 ولا أتلف بالأعلام

حاموت في قرية

عريانة من الإعلام

مواطن زى جيرانى

وحامشيها على كتافهم

فدول أطيب ودول أكرم

وروح الحب في قلوبهم

لا مهرجانات ولا أفلام.

تراب أقدامهم العالية

نشيد إنسانى ومشاعر

وفيهم ناس تشيعنى عشان طيب

وناس بتحبنى شاعر

ولا طلعوا بقطط فاطسة

ولا جرحوا في يوم صدقى

ولا وصفونى بالأظلم...

ودول مش أهل بقرابة

ودول ناس يزرعوا خيرهم

سوا ليهم.. سوا لغيرهم

وضحكتهم شديدة الصدق

ودمعتهم أصيلة الحزن..

دموع ماتعلمتش تكون

كده وكده.. وكدابة

ومش راح يطلعوا في شاشات

حزانى بدمعة كدابة..

دول عشرة بلا عيرة

بلا كتابة ولا قراية

وناس تعرف قوى تحزن

وما لهاش يوم في مين أحسن

عباد نابتة كشجر الأرض

كتوف اعتادوا على شيل بعض

حياة عايشينها كالأغراب

وأولها وآخرها تراب

وفى الفرحة بيتلموا

قبل ما تبتدى تتفض.

ولا بيقولوا نعشق مصر

ولا هتفوا في يوم للنصر

تمر الجوزة غلبانة

صدور يملوها دخانة

وزيى بينهجوا ف خطوة

ومن يدخل إلى الحفرة

لا يتراجع ولا يتخض

واذا اتزحلق على القبلة

كما في حياته لا يرتد..

يسيب العيلين للزرع

وهيه اللعبة أصل وفرع

تكون فرع النهارده كبرت

يموت الأصل تبقى الأصل

وتورث علقة القيراطين

وتورث جوزة الوالد

عصايته وهدمتين اتنين

وتجرى الدنيا والأيام بتشبه بعض

والزايد يكمل بعض..

وكُرما في كلمة اتفضل

ويجروا على اللى يتعطل

وما سابونيش.. لوحدى ف يوم

مشاعر خايبة ما تهمش..

ما بينكم حد..

إنتو بتوع ياللا اقلب

لكن تكبيرة الفقرا ورا نعشك

ما فيش فيها اللى حيغشك

ولا ورا نعشك الغلبان

حينبط فلان وفلان..

ويمشى وراك يتأكد

بإنك مت موتة بجد

وحتوسع عشان ما يمر

وأنا غايب بقى لى كتير

زرعت شجر بيطرح خير

وعشت ما بين فقير وفقير

كتبت قليل وناس منكم

تشوفه كتير..

وتتمد الأيادى عزا

وكام كلمة من الشفه

وما عرف راح يعزوا مين..

إخواتى.. تعيش أنت

وحتى ولادهم إن نصبوا

حيبقى هناك في الحتة

مكان ما جيت لهم عيان

وسألوا عنى صبح وعصر

لما عرفوا جيت لهم

ومش راجع بمرضى لمصر

وتقسم زيهم عيشك وحاقسم وسطهم عيشى

وتقسم زيهم.. قرشك وحاصرف ع الجميع قرشى

عشان دا حيجرى الكل ورا نعشى

أخوهم مات

أبوهم مات

يساهموا في قفلة الفتحة

ويقروا عليا ميت فاتحة

ولما يعودوا يتلموا..

يجيبوا السيرة.. يفتكروا

حكايات المعيشة معاى

وم البيت دا وم البيت دا

صنية شاى..

ودا يحكى ودا يسمع

ومنهم برضه ناس يترحموا

يقولوا: كان مونسنا..

وكان طيب..

وعكس اللى انتو راح تقولوه

وكان دايماً بيتعسنا

لا دول شعرا ولا كتاب

ولا (سديت عليهم باب)

سنين بينهم ما فيش كلمة

لئيمة تنشر الضلمة..

ولا تشنيع من الشعرا

ولا واحدة بتحسدنى

لإن أبوها مات قبلى

ولا شاعر ما هوش شاعر

يا إما تشيله فوق كتفك

يا إما تشيل قاذوراته ليوم حتفك

أنا لا كتبت سيرتى كدب

ولا لبستش قميص زايف

ولا في سجنى لقانى الظابط الهايف

في يوم خايف..

ولا زعيقه المجوف هز ليّا في يوم

هدْب.

■ ■ ■

بنيت مقبرتى

فوق التل..

بعيد حتى عن الزيارات

ويمكن تحسدوا الموته

ويمكن تحسدوا قبرى

وتقولوا: «ده مات موسر»

فإنتو لا تفهموا في الحزن

ولا في القبر

ولا حاجه في عيشة الستر

وياما قالوا من قالوا

وأنا استخسرت حتة رد

حتى لو تلات كلمات

وكان نفسى – كما أصحابى –

يقصر ربنا عمرى

لأن اللى يعيش أكتر

أكيد أعداؤه بينالوا..

من الجسد الهزيل أكتر

لشاعر وسط ما احتدمت

عمره ما قص مواله.

■ ■ ■

وداعا يا ميدان الموتى مش جايلك

ولا حاتلف بالألوان..

كما العادة.

فهمت اللعبة بزيادة

وشيلتى في عزاك بفلوس

هنا مجان..

هنا الناس غير

نفوس ونفوس

ومش حاظلم جميع الناس

لأنى مازلت لى أحباب

حيحزنهم

وبالعلم اللى لفوا بيه

كتير أبدان ما تستاهلوش

تغطيهم وتسترهم

ما يتستروش

ولا يفضلش م السيرة.