خبوا المفتاح

مش وقته يا جماعة

القصة لسه طوالي

وبدنا مئة مفتاح قبل هالمفتاح

صحيح المفتاح مش للبيع او المبادلة

بس كمان مش للمزاودة ولا للفرجة

المفتاح مش للمسابقات المحلية ولا الدولية، ومش محتاجين ندخله موسوعة جنتس

مش كل واحد يرفع هالمفتاح في وجوهنا عشان يتف في خلقتنا وينشف ريقنا

ولا كل واحد يزوقه ويلونه ويعمل منه سنسال ولا ميدالية عشان يضحك علينا

المفتاح من حق اهله بس...

واللي بيحب اهله وبده ياهم يرجعوا لبلادهم لازم ياخذ باله منهم

لازم يخفف عنهم ويحبهم ويحترمهم

لازم يرحم الضعيف واليتيم والمريض والسواق والطالب والخريج...لازم يرحم عنين النسوان اللي تخزقت من العتمة ومن اللدات

لازم يعطف على الامهات والاباء اللي بشوفوا ولادهم بموتوا وبانتحروا وبنحرقوا وبنجنوا قدامهم وهم مش قادرين يعملوا الهم اشي

بدكم ايانا نرجع على البلاد واحنا مجانين...هيك بنخربها مش بنعمرها......والبلاد كمان بترضاش فينا بدون عقولنا!

والمجنون كمان لا بحرر بلاد ولا عباد!

بالله عليكم هالسنة قللوا من الخطب والزعاق والردح عن المفتاح ويومه....يقطع المفتاح ويومه.... الناس زهقانة...مش قادرة تتحمل مزاودتكم ولا تشوف وجوهكم....فكوا عن وجوهنا وريحونا من خلقتكم احسن واقل مناهدة،

لسه بدري كثير على هالمفتاح

بدنا مفاتيح كثير قبله....مش هيك ولا لأ؟!

اللي بيقول لأ ........ يحط عينيه في عيني!!!